كب كيك الفوندان
عملته ليلة راس السنة ( الكريسماس )
طريقة الكيكة العادية
كوب سمن بحرارة الغرفة
كوب سكر
4 بيضات
فانيليا
نضربهم كويس بمضرب يدوي
وبعدين ننزل عليهم 3 اكواب دقيق منخول وكيس بيكنج باودر
بس بنزل الدقيق شوية شوية ونقلب
لحد ما نحطه كله
وبعدين بنضيف كوب عصير برتقال ولو مفيش ممكن كوب فانتا او كوب عصير تانج او كوب لبن
ويتقلب كويس وبعدين انا استخدمت قالب كب كيك وفيه ورق زبدة بتاع الكب كيك
ونحط في ورق الزبدة الخليط بتاع الكيك وفى حاجه اختيارى ممكن نعملها وممكن لا
انا جبت m&m وحطيته ف الخليط وغرزته بخلة لجوة ولما بيدخل الفرن بيسيح باللون بتاعه والشيكولاته اللى جواه وبيبقى جمييييييييل جدا لما الكيك بيتقطع
اللى عايزة تحطه تحطه واللى مش عايزة مش ضرورى
والفوندان انا جايبة عجينة الفوندان جاهزة وشكلتها بايدي
ودهنت الكيك قبل ما احط عليه الفوندان بكريمة الزبدة
طريقة كريمة الزبدة
كوب زبدة بحرارة الغرفة وكوبين سكر بودرة ويضربوا كويس بمضرب كهربائى ويتحطوا فى علبة وممكن تخزنيه فى التلاجة ولما تحتاجيه تطلعيه من قبلها بشوية عشان يفك وميبقاش جامد
وياخد حرارة الغرفة
ولما باجي اشكل بدهن الكب كيك من فوق بكريمة الزبدة
وبشكل الشكل اللى انا عايزاه وبحط الاول ارضيه من الفوندان مدورة وبقطعها بقطاعات او بكوبايه لو مش عندك قطاعه مدورة
وبعدين بشكل اشكال وبلزقها بشوية سكر مطحون عليه نقطة مايه بسيطة جدا
وده يبقى شكل كب كيك الفوندان
وألف هنا :)