فتة الشاورما السورى بالتومية
الطريقة :
في الاول عملت التومية وهيا عبارة عن
بيضتين وضربتهم فى الخلاط لحد ما لونهم بقا مايل للابيض
وبعدين ضفت عليهم كوبايه زيت شوية شوية مش كلها مرة واحده لحد ما قوام البيض تقل
وبعدين ضفت ربع كوب خل وملح وفلفل وتوم مفروم بالملح والفلفل والكمون حوالى معلقه صغيرة
وبضربهم كويس جدا وبحطهم فى علبه فى التلاجة او برطمان بس حاجه تكون محكمة
وبعدين عملت الشاورما
كان عندي لحمة ستيك شرايح غسلتها ونقعتها فى ماية وخل
وبعدين سلقتها فى حلة فيها ماية و2 حبهان وورقة لوري وبصله صغيرة
بقشرها بس ومش بقطعها عشان يبقى سهل عليا اشيلها وارميها
وبعد ما اللحمه بتتسلق بحط الملح والفلفل بتاعها وبكده نبقى استفادنا بحاجتين
عملنا شوربة من اللحمة وسلقنا اللحمة عشان لما نيجي نعملها شاورما تبقى طرية
وبعدين قطعتها صوابع كده اللى هيا شرايح طولية
وحطتيها فى بولة وتبلتها بملح وفلفل وكمون وبهارات لحمة وكارى وجنزبيل مطحون ومعلقة مايونيز كبيرة ومعلقتين كبار تومية
وتبلت اللحمه بيها كويس وحطتها فى التلاجة وكنت عملاها من بالليل ولو مش عندك وقت بتسبيها حوالى ساعتين فى التلاجة
وبعدين طلعتها وجبت طاسه حطتها على النار
وحطيت فيها شوية زيت صغيرين واول ما الزيت سخن
بصلة متقطعه جوانج واول ما دبلت نزلت اللحمه تتشوح
وبعدين حطيت عليها باقى الصوص اللى اتبقى فى البولة
وفى الاخر قبل ما اقفل على الشاورما حطيت عليها شرايح فلفل الوان
وقلبتها كويس وطفيت عليها
وبجيب عيش سورى وبقطعه قطع صغيره شوية وبحمصه فى مقلايه مع حته سمنة صغيره
لحد ما يدي على لون دهبى او بني فاتح
وكنت عملت الرز بالكاري وطريقته :
بحط زيت ف الحلة وعليه بصله مفرومة وعليها شوية كارى لحد ما تدبل وبنزل عليها الرز المغسول
واقلبه كويس لحد ما ياخد طعم ولون الكارى
وبعدين بضيف الماية وانا بحط مدقدار الماية اد مقدار الرز
وبعدين بغطى الحلة والنار عالية واول ما الرز يشرب مايته
بوطى عليه لحد ما يستوى فى خلال ربع ساعه تقريبا
لو كمية الرز كبيرة وقته بيبقى اكتر من ربع ساعه
وطريقة التقديم بتبقى بخطوات
الاولى بحط فى طبق التقديم العيش المحمص
وبعدين بحط الرز بالكارى
وبعدين بحط الشاورما السورى اللى عملناها بالفلفل الألوان
وبعدين بطلع تومية من اللى عملناها وبرش علي الفتة من فوق
وبكده الأكلة خلصت
وتتقدم
وبألف هنا :)