حلوي البسكوت بالكريمة وصوص الشيكولاتة ( سهلة وسريعة )
المقادير :
باكيت بسكوت ماري من اللي بجنيه
معلقه نسكافيه مدوبة فى نص كوباية ماية مع معلقتين سكر ويا ريت ميكونش سخن ندوبة على البارد
كيس كريم شانتيه
فنجان صغير لبن ساقع لخفق الكريمة
صوص شيكولاته ( مكوناته : نص كوب زيت - تلت تربع كوب سكر - 4 معالق كاكاو كبيرة - فانيليا - كوب لبن )
فول سوداني للتزين او اى مكسرات
الطريقة :
هنجيب بولة ونفضى فيها كيس الكريم شانتيه وننزل عليه اللبن المتلج شوية شوية ونضرب بالمضرب الكهربائى لحد ما يدينا القوام بتاع الكريمة
وهنسيب البولة على جنب وبعدين هنجيب البسكوت ونغطسه فى النسكافيه بمعلقه ونطلعه بسرعه جدا يعني يا دوبك ينزل ويطلع ونسيبه على جنب لحد ما نخلص كل البسكوت
وبعدين هنرجع تاني للكريم شانتيه ونحط بين كل بسكوته والتانيه ونلزقهم فى بعض لحد ما نكون عمود كامل من البسكوت وبعدين ندهن البسكوت كله من بره بطبقة من الكريم شانتيه
ونكون عاملين صوص الشيكولاته فى الخلاط وعشان يكون تقيل انا حطيت تلت تربع كوب سكر على نص كوب زيت ونص كوب لبن و4 معالق كاكاو وكيس فانيليا
وبعدين نزلت على البسكوت بالشيكولاته وحطيت عليها الفول السودانى
ودخلتها التلاجة
ولما قطعتها بعد ما طلعتها من التلاجه كانت طرية جدا وجميلة زي الكيك كده وقطعتها بالورب
وحلوة جدا فى التقديم وسهله وسريعة ومش مكلفة خالص
وبألف هنا على قلبكوا :)
