شاورما الفراخ السوري بالتومية
طريقة عمل الشاورما السوري :
فراخ مستوية متقطعه شرايح كان صدر وورك ودبوس وانا خلتهم من العضم وقطعتهم وسبتهم على جنب وجبت طاسة وحطيت فيها شوية زيت وبصلة متقطعه جوانح وقلبتها ف الزيت لحد ما دبلت وبعدين نزلت الفراخ عليها وقلبتها كويس معاها وحطيت عليها ملح وفلفل وكمون وكارى وجنزبيل وزعتر وبصل بودر وتوم بودر وشوية خل ونص لمونة وبعدين قلبتها كويس ونزلت عليها طماطم شرايح وبعدين فلفل اخضر شرايح وقلبتهم كويس وحطيت عليهم معلقتين كبار مايونيز ومعلقتين تومية وقلبتهم كويس وسبتهم حوالى 3 دقايق وطفيت عليهم ( ملحوظة يمكن استخدام قطع الفراخ نية مش لازم تكون مستوية .. وانا اللى عاملة التومية في البيت والمايونيز )
طريقة المايونيز :
بيضتين ويضربوا ف الخلاط كويس جدااا لحد ما لونهم يبيض وبعدين هتجيبى نص كوبايه زيت او تلت تربع كوبايه زيت وتضفيهم حبه حبه وتضربى الخليط وبعدين هتحطى معلقتين كبار خل وتضربى الخليط وشوية ملح وشوية فلفل وتضربى الخليط وتحطيه ف برطمان وتعنيه ف التلاجة اوعي تحطيه بره عشان ميضربش منك
طريقة التومية :
نفس طريقة المايونيز لكن بيضاف عليها حوالى 3 فصوص توم مفرومين وانا ضفت توم مفروم ومتبل متخزن عندي ومكنتش متخيله ان طعم التومية هيطلع حلو اوى كده
0 التعليقات:
إرسال تعليق