بيتزا البسطرمة بعجينة العشر دقايق
الطريقة :
المجموعة الاولي
2 كوب دقيق
2 معلقة كبيرة خميرة فورية تقريبا الكيس بيكون معلقة فأنا حطيت كيسين
2 معلقة كبيرة سكر
2 معلقة لبن نيدو
2 كوب ماء دافي مش سخخخخخن ولا ساقع
بنخلط النواشف على بعض وبعدين نحط المايه هنلاقيها بقت شبه العجينة السايلة
هنسبها عشر دقايق ونروح نجهز المجموعة التانية
اللي هيا
3 كوب دقيق
نص كوب زيت
ونحطهم على المجموعة الأولي ونسبهم بردو 10 دقايق
انا حطيت العجينة ف الميكروويف 30 ثانية بالظبط
لقتها اتنفخت وخمرت على طول
وبصراحة استنيت كمان ع العجينة وبعدين استخدمتها مستخدمتهاش على طول لقتها خمرت اكتر
طريقة صلصة البيتزا
معلقتين صلصلة بيوريه
كيسين كاتشب
3 فصوص توم مهروسين
ملح
فلفل
كمون
زعتر
وحوالى نص كوب ماية
وبنقلبهم ونحطهم ع النار بس ياخدوا غلوة واحدة
البيتزا بقا انا فردتها بالنشابة وحشيت الجوانب كلها جبنة رومي
وحطيت ف النص الصلصة بتاعه البيتزا وفوقها طماطم متقطعه مكعبات
وفلفل اخضر حلقات وبعدين حطيت البسطرمة
وبعدين الجبنة الموتزاريلا ورصيت ع الوش حلقات زتون اخضر
ودهنت الجوانب صلصة بيتزا
ودخلتها فرن سخن قعدت حوالى 10 دقايق ل ربع ساعه متأخرتش خالص
وطعمها كان تحفة
اللي مجربش عجينة العشر دقايق يجربها
هتعجبكوا جدا
وبألف هنا :)