كفتة فراخ مشوية وكفتة لحمة مشوية وبرجر مشوي ( مشاوي )
الطريقة :
طريقة كفتة الفراخ المشوية :
بيبقى عندنا صدور فراخ مخلية بنغسلها كويس وبننقعها ف ماية وخل وبعدين بنقطعها مكعبات
ونحطها ف الكبة ومعاها ملح وفلفل وكمون وزعتر وكارى وبيضة وحوالى معلقتين كبار فجيتار وشوية زيت وبقدونس
وبعدين بنفرمهم في الكبة كويس
ويستحب تتحط ف التلاجة حوالى نص ساعه عشان متفكش على الشوايه
وبعدين بنعملهم صوابع ونحطهم فى الشيش ونشويهم على الشوايه بس ندهن الشوايه زيت وندهن الكفتة زيت عشان متلزقش على الشواية
وممكن تتشوى على الجريل اللى بتتحط على البوتجاز
وبتطلع تحفة
طريقة كفتة اللحمة المشوية :
بنجيب الكمية اللى عاوزنها بناخد نصها ونحطه فى الكبة ونضيف عليه بصلة وبيضة وملح وفلفل وكمون وبهارات لحمة ومعلقتين كبار فجيتار وزيت وبقدونس لو حابين مش حابين يبقى مش مشكلة
ونفرم الكمية اللى حطيناها فى الكبة
وبعدين بنطلعها نخلطها على الكمية اللى متفرمتش
يعني بنفرم نص الكمية ونصها التاني مش بنفرمه ونخلطهم على بعض
وبنكون ناقعين الشيش فى ماية عشان ميتحرقش ع الشواية
وبعدين بنصبع الكفتة ونحطها فى الشيش وندهن الشواية ونحط الشيش عليها
ونتابع الكفتة عشان متتحرقش ولو عندنا حتة لية بنحطها على النار بتاعه الشواية او السخان بتاع الشواية عشان تطلع ريحتها ودي اساسى لو عايزة الكفتة تطلع زي كفتة الحاتي ولو بتحبى اللية يبقى افرميها مع اللحمه فى الكبة
طريقة البرجر المشوى :
كان عندي برجر حلواني جاهز ودهنته بالفرشة زيت ونزلته ع الشواية وبجد بجد احلى كتير من اللى بيتحمر ف المقلايه اللى كلها زيت
وطعمه بجد رهييييييييييب
وكده كده الشوايه بتنزل كل الزيوت دي وبتنشفها يعني الاكل المشوى صحي اكتر من المقلي والمحمر فى الزيت
وبكده تكون الأكلة خلصت وبتتقدم مع طحينة وعيش
وبألف هنا :)
0 التعليقات:
إرسال تعليق