تورتة باربي بعجينة الفوندان
عملتها لعيد ميلاد اختي الصغيرة انهارده
انا عملتها بكيكة عادية عشان اقدر اضغط عليها براحتي واظبطها كويس من غير ما تتفتفت مني
طريقة الكيكة العادية
كوب سمن بحرارة الغرفة
كوب سكر
4 بيضات
فانيليا
نضربهم كويس بمضرب يدوي
وبعدين ننزل عليهم 3 اكواب دقيق منخول وكيس بيكنج باودر
بس بنزل الدقيق شوية شوية ونقلب
لحد ما نحطه كله
وبعدين بنضيف كوب عصير برتقال ولو مفيش ممكن كوب فانتا او كوب عصير تانج او كوب لبن
ويتقلب كويس وبعدين نكون داهنين القالب اللى هنعمل فيه بمادة دهنية (زيت او سمن) ودقيق
ونحط فيه الخليط بتاع الكيك وفى حاجه اختيارى ممكن نعملها وممكن لا
انا جبت m&m وحطيته ف الخليط وغرزته بخلة لجوة ولما بيدخل الفرن بيسيح باللون بتاعه والشيكولاته اللى جواه وبيبقى جمييييييييل جدا لما الكيك بيتقطع
اللى عايزة تحطه تحطه واللى مش عايزة مش ضرورى
والفوندان انا جايبة عجينة الفوندان جاهزة وشكلتها بايدي
ودهنت الكيك قبل ما احط عليه الفوندان بكريمة الزبدة
طريقة كريمة الزبدة
كوب زبدة بحرارة الغرفة وكوبين سكر بودرة ويضربوا كويس بمضرب كهربائى ويتحطوا فى علبة وممكن تخزنيه فى التلاجة ولما تحتاجيه تطلعيه من قبلها بشوية عشان يفك وميبقاش جامد
وياخد حرارة الغرفة
والعروسة انا شايلة رجلها عشان اقدر احطها فى الكيك وفرغت دايره ف النص على ادها بالظبط عشان ادخلها فى الكيك
0 التعليقات:
إرسال تعليق