تورتة البامبرز
الخامات
كرتونة نتيجة قديمة
سبراى سيلفر
فرشة دهانات صغيرة
4 رول كرتونة فاضى من بتاع مناديل الحمام اللى لما المناديل بتخلص بنرميه
كرتونة مستطيلة رفيعة لعمل الدور التاني من التورتة وهتبان فى الصورة
علبة بامبرز مش اقل من 65 قطعة
استك
5 متر شريط ستان لبني
متر ونص تل تركواز
مسدس شمع
شامبو جونسون
بودرة جونسون
بيبى شاور جونسون
زيت جونسون
مشط بيبي
فرشة بيبي
تتينا
ببرونة ازاز مش بلاستيك عشان البلاستيك مضرة
الطريقة
اول حاجه برش الكرتونة بتاعه النتيجة القديمة بالاسبراى واحط تحتها جرايد عشان متبهدلش المكان اللى برشها فيه واجيب الفرشة بتاعه الدهانات وامشى بالطول عشان لو فى اى كلاكيع من الاسبراى تتظبط
وبعدين اسبها تنشف حوالى ربع ساعه او 10 دقايق على حسب ما تنشف معايا
وبعدين بجيب البامبرز والفه رول واحط استك لحد ما اخلص كل اللى عندي
وبعدين احط شمع على كرتونة النتيجة واحط رول جنب رول لحد ما اخلصهم ومش بحط على الطرف بحط جوة شوية واعمل صف مستطيل تانى جوة
وبعدين بجيب رول الكرتون بتاع المناديل وبحط ال 4 فى النص جنب بعض
وببقى راشة الكرتونة المستطيلة الرفيعة بالاسبراى السيلفر ولما بتنشف بلزقها بالشمع على الرولات اللى حطتها
وبعدين بعمل صف بامبرز فى نص الكرتونة والزقه واجيب استك تانى واثبت الشاور والشامبو والبودرة والحاجات دي كلها
واظبطها بشكل حلو
وبعدين بجيب الشريط الستان وبلفه واربطه على اول صف من التورته
وبعدين تاني صف من التورتة واعمل فيونكة هنا وفيونكة هنا
وبفرش التل على ترابيزه واحط التورتة فى نص التل وارفعه الف التورتة واربطه بستان
وبكدة تكون التورتة جاهزة
يا رب تعجبكوا واكون قدرت اوصلكوا الطريقة
0 التعليقات:
إرسال تعليق