تورتة الكيت كات
عملتها فى عيد ميلاد جوزي
وهيا عباره عن طبقة من الكيك العادي
وطبقة كريم شانتيه
وطبقة هوهوز من اللى بتتباع فى السوبر ماركت
وطبقة كريم شانتيه
وطبقة m&m او شوكوبون
وملفوف حواليها شيكولاته كيت كات
طريقة الكيكة العادية
كوب سمن بحرارة الغرفة
كوب سكر
4 بيضات
فانيليا
نضربهم كويس بمضرب يدوي
وبعدين ننزل عليهم 3 اكواب دقيق منخول وكيس بيكنج باودر
بس بنزل الدقيق شوية شوية ونقلب
لحد ما نحطه كله
وبعدين بنضيف كوب عصير برتقال ولو مفيش ممكن كوب فانتا او كوب عصير تانج او كوب لبن
ويتقلب كويس وبعدين نكون داهنين القالب بتاع التشيز كيك اللى هنعمل فيه بمادة دهنية (زيت او سمن) ودقيق وبردو زيادة تأكيد عشان ميلزقش هنقطع دايرة من ورق الزبدة اد ارضية الصينية وندهنها شوية زيت بالفرشة
ونحط فيه الخليط بتاع الكيك
وبعدين بندخله الفرن على درجه حرارة 180
ولما تخلص بنطلعها تبرد
وبعدين بنفتح صينية التشيز كيك وندهن الكيك بطبقة من الكريم شانتيه وندهن الجوانب
وبعدين بنجيب الهوهوز اللى بيتباع ف السوبر ماركت ونقطعه حلقات ونحط منه طبقة ولو عايزة تزودى زودي مفيش مشكلة
وبعدين بنحط طبقة كمان من الكريم شانتيه
وبعدين بنجيب جوانب الصينية بتاعه التشيز كيك اللى هيا بتتقفل بالكلبس ونحطها حوالين الكيك من غير ما نقفلها وبعدين نبدأ نحط الكيت كات جنب بعضه
وبعدين نسيب مكان فاضى مفهوش كيت كتايه وتقفل الكلبس بتاع الصينية هنلاقيها اخدت الشكل كامل وبعدين هنحط البونبوني بتاع m&m او شوكوبون اللى متوفر عندك
وبعدين بتدخل التلاجة بقا ولما بطلعها بفك الصينية واربط التورتة بشريط ستان واعمل فيونكة شكلها شيك
وتتقدم وتتأكل بقا بقا بقا
وبالهنا والشفتشي
0 التعليقات:
إرسال تعليق